Latest News | Kerala | Trending News | dontmiss | ELECTION 2026

യുഡിഎഫ് പ്രചാരണത്തിന് കരുത്തായി രാഹുൽ ഗാന്ധി എത്തുന്നു; ബുധനാഴ്ച കോഴിക്കോട് യുഡിഎഫ് റാലി; കേരളം ആവേശത്തിൽ

Jaihind TV Web Desk

March 20, 2026

1 min read • Updated: May 26, 2026

യുഡിഎഫ് പ്രചാരണത്തിന് കരുത്തായി രാഹുൽ ഗാന്ധി എത്തുന്നു; ബുധനാഴ്ച കോഴിക്കോട് യുഡിഎഫ് റാലി; കേരളം ആവേശത്തിൽ

തിരുവനന്തപുരം: കേരളത്തിലെ നിയമസഭാ തിരഞ്ഞെടുപ്പ് പ്രചാരണത്തിന് ആവേശം പകരാൻ ലോക്സഭ പ്രതിപക്ഷ നേതാവ് രാഹുൽ ഗാന്ധി എത്തുന്നു. വരാനിരിക്കുന്ന ബുധനാഴ്ച കോഴിക്കോട് നടക്കുന്ന യുഡിഎഫ് മഹാറാലിയിൽ അദ്ദേഹം പങ്കെടുക്കുമെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ അറിയിച്ചു. രാഹുൽ ഗാന്ധിയുടെ വരവോടെ സംസ്ഥാനത്തെ യുഡിഎഫ് പ്രചാരണ രംഗം ദേശീയ ശ്രദ്ധാകേന്ദ്രമായി മാറും.

കോഴിക്കോട് കടപ്പുറത്ത് നടക്കുന്ന റാലിയിൽ വൻ ജനപങ്കാളിത്തമാണ് യുഡിഎഫ് പ്രതീക്ഷിക്കുന്നത്. വടക്കൻ കേരളത്തിലെ വിവിധ മണ്ഡലങ്ങളിലെ യുഡിഎഫ് സ്ഥാനാർത്ഥികൾക്ക് പിന്തുണ പ്രഖ്യാപിച്ചുകൊണ്ടുള്ള വിപുലമായ പ്രചാരണ പരിപാടികൾക്കാണ് രാഹുൽ നേതൃത്വം നൽകുക. രാഹുലിനൊപ്പം കോൺഗ്രസിന്റെയും യുഡിഎഫിന്റെയും മറ്റ് ദേശീയ-സംസ്ഥാന നേതാക്കളും വേദി പങ്കിടും.

കേരളത്തിലെ തിരഞ്ഞെടുപ്പ് പ്രവർത്തനങ്ങൾ സസൂക്ഷ്മം നിരീക്ഷിക്കുന്ന കേന്ദ്ര നേതൃത്വം, പ്രചാരണത്തിന്റെ അവസാന ഘട്ടത്തിൽ കൂടുതൽ മുതിർന്ന നേതാക്കളെ രംഗത്തിറക്കുമെന്നും കെ.സി. വേണുഗോപാൽ വ്യക്തമാക്കി. വരും ദിവസങ്ങളിൽ പ്രിയങ്ക ഗാന്ധി അടക്കമുള്ള പ്രമുഖ നേതാക്കളും കേരളത്തിലെ വിവിധ മണ്ഡലങ്ങളിൽ യുഡിഎഫിനായി വോട്ട് തേടിയെത്തും. യുഡിഎഫിന്റെ വിജയസാധ്യതകൾ വർദ്ധിപ്പിക്കുന്നതിനും പ്രവർത്തകർക്ക് ഊർജ്ജം പകരുന്നതിനും ദേശീയ നേതാക്കളുടെ സന്ദർശനം നിർണ്ണായകമാകുമെന്നാണ് വിലയിരുത്തൽ.