കോൺഗ്രസിന്റെ കരുത്തുറ്റ സംഘാടകൻ ഓർമ്മയായി; ചാലക്കുടി മുൻ എംപി കെ.പി. ധനപാലൻ അന്തരിച്ചു

കൊച്ചി: ചാലക്കുടി മുൻ എംപിയും എറണാകുളം ഡിസിസി മുൻ പ്രസിഡന്റുമായ മുതിർന്ന കോൺഗ്രസ് നേതാവ് കെ.പി. ധനപാലൻ (76) അന്തരിച്ചു. അസുഖബാധിതനായി ചികിത്സയിലിരിക്കെ ഇന്ന് രാവിലെയായിരുന്നു വിയോഗം. കോൺഗ്രസിന്റെ മുൻനിര നേതാക്കളിലൊരാളായ അദ്ദേഹം എറണാകുളം ജില്ലയിലെ രാഷ്ട്രീയ-സാമൂഹിക മണ്ഡലങ്ങളിൽ പതിറ്റാണ്ടുകളായി സജീവ സാന്നിധ്യമായിരുന്നു. അദ്ദേഹത്തോടുള്ള ആദരസൂചകമായി രാവിലെ 11 മണി മുതൽ പറവൂർ മുനിസിപ്പൽ ടൗൺ ഹാളിൽ പൊതുദർശനം ക്രമീകരിച്ചിട്ടുണ്ട്. സംസ്കാരം വൈകുന്നേരം 5 മണിക്ക് നടക്കും.

വിദ്യാർത്ഥി പ്രസ്ഥാനമായ കെഎസ്‌യുവിലൂടെയാണ് കെ.പി. ധനപാലൻ പൊതുരംഗത്തേക്ക് പ്രവേശിക്കുന്നത്. കെഎസ്‌യു എറണാകുളം ജില്ലാ സെക്രട്ടറി, യൂത്ത് കോൺഗ്രസ് ജില്ലാ പ്രസിഡന്റ്, സംസ്ഥാന വൈസ് പ്രസിഡന്റ് എന്നീ നിലകളിൽ മികച്ച സംഘാടക മികവ് തെളിയിച്ചു. തുടർന്ന് എറണാകുളം ഡിസിസി പ്രസിഡന്റായി ദീർഘകാലം പ്രവർത്തിച്ച അദ്ദേഹം പാർട്ടിയെ ജില്ലയിൽ അടിത്തട്ടിൽ മുതൽ ശക്തമാക്കുന്നതിൽ നിർണായക പങ്കുവഹിച്ചു. കെപിസിസി സെക്രട്ടറി, ജനറൽ സെക്രട്ടറി, വൈസ് പ്രസിഡന്റ് എന്നീ പദവികൾ വഹിച്ച അദ്ദേഹം ഹൈക്കമാൻഡ് പ്രതിനിധിയായി ലക്ഷദ്വീപിലും പാർട്ടി പ്രവർത്തനങ്ങൾക്ക് നേതൃത്വം നൽകിയിട്ടുണ്ട്.

2009-ലെ ലോക്‌സഭാ തിരഞ്ഞെടുപ്പിൽ പുതുതായി രൂപീകരിക്കപ്പെട്ട ചാലക്കുടി മണ്ഡലത്തിൽ നിന്നാണ് അദ്ദേഹം വൻ ഭൂരിപക്ഷത്തോടെ പതിനഞ്ചാം ലോക്‌സഭയിലേക്ക് തിരഞ്ഞെടുക്കപ്പെടുന്നത്. പാർലമെന്റിൽ മികച്ച പ്രവർത്തനം കാഴ്ചവെച്ച അദ്ദേഹം മിൽമ ചെയർമാൻ, ക്ഷീരകർഷക ക്ഷേമനിധി ബോർഡ് ചെയർമാൻ, കൊച്ചിൻ യൂണിവേഴ്സിറ്റി സെനറ്റ് അംഗം, നോർത്ത് മലബാർ ഗ്രാമീൺ ബാങ്ക് ഡയറക്ടർ ബോർഡ് അംഗം എന്നീ നിലകളിലും ശ്രദ്ധേയമായ സേവനമനുഷ്ഠിച്ചു. പറവൂർ നഗരസഭയിൽ പത്ത് വർഷത്തോളം കൗൺസിലറായും ജനപ്രതിനിധിയായി അദ്ദേഹം തിളങ്ങി.

1950 ഏപ്രിൽ 4ന് നോർത്ത് പറവൂരിലായിരുന്നു അദ്ദേഹത്തിന്റെ ജനനം. ആലുവ യു.സി കോളജിൽ നിന്നാണ് ബിരുദം പൂർത്തിയാക്കിയത്. സുമം ധനപാലനാണ് ഭാര്യ. മക്കൾ: പരേതനായ ബ്രിജിത്, മിലാഷ്.