India | Trending News | dontmiss | UNION BUDGET 2026

സാധാരണക്കാരെ മറന്ന ബജറ്റ്; 'മറുപടി സഭയിൽ പറയും'; കേന്ദ്ര ബജറ്റിനെതിരെ ആഞ്ഞടിക്കാൻ രാഹുൽ ഗാന്ധി

Jaihind TV Web Desk

February 02, 2026

1 min read • Updated: May 27, 2026

സാധാരണക്കാരെ മറന്ന ബജറ്റ്; 'മറുപടി സഭയിൽ പറയും'; കേന്ദ്ര ബജറ്റിനെതിരെ ആഞ്ഞടിക്കാൻ രാഹുൽ ഗാന്ധി

കേന്ദ്ര ധനമന്ത്രി നിർമ്മല സീതാരാമൻ അവതരിപ്പിച്ച 2026-27 സാമ്പത്തിക വർഷത്തെ ബജറ്റിന്മേലുള്ള തന്റെ ഔദ്യോഗിക പ്രതികരണം ഇന്ന് പാർലമെന്റിൽ രേഖപ്പെടുത്തുമെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി അറിയിച്ചു. ബജറ്റ് അവതരണത്തിന് ശേഷം പാർലമെന്റിന് പുറത്ത് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. ബജറ്റിലെ പോരായ്മകളെക്കുറിച്ചും രാജ്യത്തിന്റെ സാമ്പത്തിക അവസ്ഥയെക്കുറിച്ചും പറയാനുള്ളതെല്ലാം സഭ നൽകുന്ന പ്ലാറ്റ്‌ഫോം ഉപയോഗിച്ച് കൃത്യമായി അവതരിപ്പിക്കുമെന്ന് അദ്ദേഹം വ്യക്തമാക്കി.

അതേസമയം, കേന്ദ്ര ബജറ്റിനെതിരെ രൂക്ഷമായ വിമർശനവുമായി കോൺഗ്രസ് നേതൃത്വം ഒന്നടങ്കം രംഗത്തെത്തിയിട്ടുണ്ട്. ബജറ്റ് തികച്ചും നിരാശാജനകമാണെന്നും സർക്കാർ നടത്തുന്ന വലിയ അവകാശവാദങ്ങൾക്കൊന്നും യാതൊരു അടിസ്ഥാനവുമില്ലെന്നും കോൺഗ്രസ് നേതാവ് ജയറാം രമേശ് കുറ്റപ്പെടുത്തി. പ്രധാന പദ്ധതികൾക്കുള്ള വിഹിതം സംബന്ധിച്ച് ബജറ്റിൽ കൃത്യമായ വിവരങ്ങൾ നൽകിയിട്ടില്ലെന്നും സുതാര്യതയില്ലാത്ത ബജറ്റാണിതെന്നും അദ്ദേഹം പറഞ്ഞു.

ബജറ്റിൽ സാധാരണക്കാർക്കായി ഒന്നുമില്ലെന്ന് ശശി തരൂർ എംപിയും പ്രതികരിച്ചു. മധ്യവർഗത്തെയും സാധാരണക്കാരെയും പരിഗണിക്കാത്ത സാമ്പത്തിക പ്രഖ്യാപനങ്ങൾ നിരാശയുണ്ടാക്കുന്നതാണെന്ന് അദ്ദേഹം പറഞ്ഞു. രാഹുൽ ഗാന്ധി ഇന്ന് പാർലമെന്റിൽ നടത്തുന്ന പ്രസംഗം ബജറ്റിനെതിരെയുള്ള പ്രതിപക്ഷത്തിന്റെ ശക്തമായ പോരാട്ടത്തിന്റെ തുടക്കമാകുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.