Popular News | Latest News | Kerala | Trending News | dontmiss

സിപിഎം സംസ്ഥാന സമിതി ഇന്ന്: തോൽവിയുടെ ആഴം അളക്കാൻ നേതൃത്വം; പിണറായിക്കും ഗോവിന്ദനുമെതിരെ പടയൊരുക്കം?

Jaihind TV Web Desk

May 13, 2026

1 min read • Updated: May 23, 2026

സിപിഎം സംസ്ഥാന സമിതി ഇന്ന്: തോൽവിയുടെ ആഴം അളക്കാൻ നേതൃത്വം; പിണറായിക്കും ഗോവിന്ദനുമെതിരെ പടയൊരുക്കം?

നിയമസഭാ തിരഞ്ഞെടുപ്പിലേറ്റ കനത്ത പ്രഹരത്തിന് പിന്നാലെ, പരാജയ കാരണങ്ങൾ വിലയിരുത്തുന്നതിനുള്ള നിർണ്ണായകമായ സിപിഎം സംസ്ഥാന സമിതി യോഗം ഇന്ന് ചേരും. തിരഞ്ഞെടുപ്പ് ഫലം പുറത്തുവന്നതിന് ശേഷം പാർട്ടിക്ക് സംഭവിച്ച അടിതെറ്റലിൽ കേഡർമാർക്കിടയിൽ വലിയ അമർഷം നിലനിൽക്കുന്ന പശ്ചാത്തലത്തിലാണ് യോഗം വിളിച്ചിരിക്കുന്നത്. സംസ്ഥാന ഭരണത്തോടുള്ള ജനവികാരം തിരിച്ചറിയുന്നതിൽ നേതൃത്വത്തിന് പരാജയം സംഭവിച്ചു എന്ന പൊതുവികാരം യോഗത്തിൽ അലയടിക്കാനാണ് സാധ്യത.

മുഖ്യമന്ത്രി പിണറായി വിജയന്റെയും പാർട്ടി സെക്രട്ടറിയുടെയും പ്രവർത്തന ശൈലിക്കും ഏകപക്ഷീയമായ നിലപാടുകൾക്കുമെതിരെ സംസ്ഥാന സെക്രട്ടറിയേറ്റിൽ ഇതിനോടകം തന്നെ കടുത്ത വിമർശനങ്ങൾ ഉയർന്നിട്ടുണ്ട്. സർക്കാരിന്റെ പ്രവർത്തനങ്ങളും ഭരണത്തിലുള്ള ചിലരുടെ സ്വജനപക്ഷപാതവും പാർട്ടിയുടെ ജനകീയ അടിത്തറ ഇളക്കിയെന്ന് ഒരു വിഭാഗം നേതാക്കൾ വാദിക്കുന്നു. കണ്ണൂർ അടക്കമുള്ള ജില്ലകളിലെ സംഘടനാപരമായ തർക്കങ്ങൾ പരിഹരിക്കുന്നതിൽ നേതൃത്വം കാണിച്ച അലംഭാവവും യോഗത്തിൽ വലിയ രീതിയിൽ ചോദ്യം ചെയ്യപ്പെടും.

സ്ഥാനാർത്ഥി നിർണ്ണയത്തിലെ പാളിച്ചകളും പലയിടങ്ങളിലും അപ്രതീക്ഷിത തിരിച്ചടിക്ക് കാരണമായതായി വിലയിരുത്തലുണ്ട്. ഔദ്യോഗികമായി പ്രതിപക്ഷ നേതൃസ്ഥാനത്തെക്കുറിച്ചുള്ള ചർച്ചകൾ ഇന്നത്തെ അജണ്ടയിൽ ഉൾപ്പെടുത്തിയിട്ടില്ലെങ്കിലും, നിലവിലെ രാഷ്ട്രീയ അനിശ്ചിതത്വം കണക്കിലെടുത്ത് സംസ്ഥാന സമിതി അംഗങ്ങൾ ഈ വിഷയം യോഗത്തിൽ ഉന്നയിക്കാൻ സാധ്യതയുണ്ട്. വരും ദിവസങ്ങളിൽ പാർട്ടിയിൽ വലിയ തിരുത്തൽ നടപടികൾക്ക് ഈ യോഗം വഴിതുറക്കുമോ എന്നാണ് രാഷ്ട്രീയ കേരളം ഉറ്റുനോക്കുന്നത്.