"സാമ്പത്തിക പരാജയം മറച്ചുവെക്കാൻ മോദി ജനങ്ങളെ ഭയപ്പെടുത്തുന്നു"; മോദിയുടെ മിതവ്യയ നയത്തിനെതിരെ ആഞ്ഞടിച്ച് ജയറാം രമേശ്

രാജ്യത്തെ സാമ്പത്തിക സ്ഥിതി സർക്കാർ പുറത്തുവിടുന്ന കണക്കുകളേക്കാൾ അതീവ ഗുരുതരമാണെന്ന് പ്രധാനമന്ത്രി നരേന്ദ്ര മോദിയുടെ സമീപകാല പ്രസംഗങ്ങൾ വ്യക്തമാക്കുന്നതായി കോൺഗ്രസ് ആരോപിച്ചു. ഹൈദരാബാദിൽ നടന്ന ബിജെപി റാലിയിൽ പ്രധാനമന്ത്രി നടത്തിയ മിതവ്യയ ആഹ്വാനം ഇതിന്റെ തെളിവാണെന്ന് കോൺഗ്രസ് ജനറൽ സെക്രട്ടറി ജയറാം രമേശ് ചൂണ്ടിക്കാട്ടി. ഇന്ധനവില വർധന അടക്കമുള്ള കടുത്ത സാമ്പത്തിക നടപടികളിലേക്ക് രാജ്യം നീങ്ങുന്നതിന്റെ മുന്നോടിയായി പൊതുജനങ്ങളെ മാനസികമായി തയ്യാറെടുപ്പിക്കാനാണ് സർക്കാർ ശ്രമിക്കുന്നതെന്ന് അദ്ദേഹം ആരോപിച്ചു.

യഥാർത്ഥ വേതനത്തിലെ സ്തംഭനാവസ്ഥ, വർധിച്ചുവരുന്ന കുടുംബ കടങ്ങൾ, തൊഴിലവസരങ്ങൾ സൃഷ്ടിക്കുന്ന മേഖലകളിലെ നിക്ഷേപക്കുറവ് എന്നിവയാണ് നിലവിലെ യാഥാർത്ഥ്യമെന്ന് ജയറാം രമേശ് പറഞ്ഞു. സർക്കാരിന്റെ അവകാശവാദങ്ങൾക്കും താഴെത്തട്ടിലെ സാമ്പത്തിക സ്ഥിതിക്കും തമ്മിൽ വലിയ അന്തരം നിലനിൽക്കുന്നുണ്ടെന്നും അദ്ദേഹം കുറ്റപ്പെടുത്തി. ഉപഭോഗം കുറയ്ക്കാൻ ജനങ്ങളോട് ആവശ്യപ്പെടുന്നതിലൂടെ വരാനിരിക്കുന്ന ബുദ്ധിമുട്ടുള്ള തീരുമാനങ്ങൾ അടിച്ചേൽപ്പിക്കാനാണ് കേന്ദ്രം ശ്രമിക്കുന്നത്.

പശ്ചിമേഷ്യയിലെ സംഘർഷങ്ങൾ ചൂണ്ടിക്കാട്ടി ഇന്ധന ഉപയോഗം കുറയ്ക്കാൻ പ്രധാനമന്ത്രി നിർദ്ദേശിച്ചിരുന്നു. പൊതുഗതാഗതം ഉപയോഗിക്കുക, കാർ പൂളിംഗ് ശീലമാക്കുക, ഇലക്ട്രിക് വാഹനങ്ങളിലേക്ക് മാറുക എന്നിവയ്ക്ക് പുറമെ സ്വർണ്ണ വാങ്ങലും വിദേശയാത്രകളും ഒരു വർഷത്തേക്ക് മാറ്റിവെക്കണമെന്നും വിദേശനാണ്യ ശേഖരം സംരക്ഷിക്കാൻ ഇത് അത്യാവശ്യമാണെന്നും മോദി പറഞ്ഞിരുന്നു. പാചക എണ്ണയുടെ ഉപയോഗം കുറയ്ക്കാനും രാസവളങ്ങളെ ആശ്രയിക്കുന്നത് ഒഴിവാക്കി പ്രകൃതിദത്ത കൃഷി രീതികളിലേക്ക് മാറാനും അദ്ദേഹം അഭ്യർത്ഥിച്ചു.

എന്നാൽ, ആഗോള പ്രതിസന്ധികൾ കൈകാര്യം ചെയ്യുന്നതിൽ സർക്കാർ പരാജയപ്പെട്ടുവെന്നാണ് കോൺഗ്രസ് ഇതിനോട് പ്രതികരിച്ചത്. രാജ്യാന്തര സാഹചര്യങ്ങൾക്കനുസരിച്ച് ഊർജ്ജ സുരക്ഷ ഉറപ്പാക്കുന്നതിൽ കേന്ദ്രം പരാജയപ്പെട്ടെന്നും അതിന്റെ ഭാരം സാധാരണക്കാരുടെ തലയിൽ കെട്ടിവെക്കുകയാണെന്നും പ്രതിപക്ഷം ആരോപിക്കുന്നു. കോവിഡ് കാലത്തെ നിയന്ത്രണങ്ങൾ പോലെ വീണ്ടും വീടിനുള്ളിൽ ഇരിക്കാനും ചിലവ് ചുരുക്കാനും പറയുന്നത് സർക്കാരിന്റെ സാമ്പത്തിക പരാജയത്തിന്റെ ലക്ഷണമാണെന്ന് കോൺഗ്രസ് കുറ്റപ്പെടുത്തി.